Жалал-Абад мамлекеттик университетинин Жалал-Абад колледжинин кесипке багыт берүүчү иш чарасы 2022-жылдын 14-май күнү Жалал-Абад шаарындагы №9 Р.Санатбаев атындагы инновациялык мектеп гимназиясында өткөрүлдү.  

   Иш  чарада  Жалал-Абад колледжинин бүтүрүүчү курстарынын студенттери жана окутуучулары өз адистиктеринин артыкчылыктары, ишке жайгашуу мүмкүнчүлүктөрү жөнүндө кыскача презентацияларды жасашып, параддан өтүштү. Бул күнү Р.Санатбаев атындагы инновациялык мектеп гимназиясына Жалал-Абад шаарынын бардык мектептеринен 9-10-11-класстын окуучулары спорттук мелдешке катышуу үчүн келишкен. Алар колледждеги ар бир адистик жөнүндө маалымат алышты -  дейт коллдждин директору Б.М. Турдубаева.

    Иш чарада төмөнкү адистиктер жөнүндө маалыматтар айтылды;

• “Маалыматтарды иштеп чыгуунун автоматташтырылган системалары жана башкаруу”
• “Автоматташтырылган системаларды жана эсептөө техникаларын программалык камсыздоо”
• “Ветеринария”
• “Автомобиль унааларын техникалык тейлөө жана  оңдоо”
• “Өзгөчө кырдаалдарда коргонуу”
• “Электр менен жабдуу”
• “Электр станциялары, түйүндөр жана тармактар”
• “Социалдык иш”
• “Мектепке чейинки билим берүү”
• “Башталгыч класстарда окутуу”
• “Чет тили”
• “Дене тарбия”
• “Финансы жана кредит (тармактар боюнча)”
• “Бухгалтердик эсеп”
• “Салык жана салык салуу”
• “Укук таануу”
• “Тигүү буюмдарын конструкциялоо,  моделдештирүү жана технология”.

     Иш чарага адистиктердин иш берүүчүлөрү, ЖАМУнун администрациясынын өкүлдөрү, шаардагы мектептердин директорлору жана Жалал-Абад колледжинин бүтүрүүчү курстарынын студенттери катышышты. “Ишкердикти өнүктүрүү” курсунда окугандар өздөрүнүн колдору менен жасаган буюмдарын, тамак-аштарын жарманкеге коюп, сатышты. Адистиктер жөнүндө буклеттер таркатылды, кесипке багыт берүүчү иш чара өз максатына жетти.