Бүгүн Б. Осмонов атындагы Жалал-Абад мамлекеттик университетинин Р. Абдыкадыров атындагы чоң жыйындар залында  балдарга арналган жаңы жылдык “Сыйкырдуу балаты” жомогу тартууланды. Майрамдык кечени уюштурууну окуу жайдын маданий-эстетикалык борбору жаштар комитети жана медициналык колледжи колго алган. Бул тууралуу ЖАМУнун социалдык иштер жана мамлекеттик тил боюнча проректору Айгуль Доранова билдирди.

Майрамдык иш-чара окуу жайдын профессордук - окутуучулар курамынын жана кызматкерлердин балдарына арналган. Кечеде аяз ата, аяз кыз түрдүү жомок каармандары, бөбөктөрдүн көңүлүн көтөрдү.

Майрамдык кийимде келген жаш балдар аяз атага өз өнөрлөрүн тартуулап түрдүү белектерди, шириндиктерди алышты. Ал эми окуу жайдын кесиптик бирлик комитети балдардын балаты майрамы менен куттуктап оюнчуктарды тартуулашты. Балдарга арналган балаты майрамына баардыгы болуп 200дөй бала келишкен. Биз баарына белек берүүгө аракет жасадык бир да бала четте калган жок -  деп билдирди кесиптик бирлик комитетинин төрайымы Минавар Маткаримова.